October 28, 2026 9:33 pm

Author: Indian Sociologist Live

સપ્તધારા જૈન મહિલા મંડળ માંડવી દ્વારા શિક્ષણની સિદ્ધિ બદલ મંજુલાબેન સંઘવીનું સન્માન

September 26, 2026 No Comments

સપ્તધારા જૈન મહિલા મંડળ માંડવી દ્વારા શિક્ષણની સિદ્ધિ બદલ મંજુલાબેન સંઘવીનું સન્માન Mandvi News પી.એચ.ડી.ની ડિગ્રી હાંસલ કરવા બદલ મંડળ દ્વારા અભિનંદન પાઠવાયા બંદરીય શહેર માંડવીમાં સપ્તધારા જૈન મહિલા મંડળ દ્વારા મંડળના સભ્ય મંજુલાબેન ભદ્રેશ સંઘવીએ પી.એચ.ડી.ની ડિગ્રી હાંસલ કરતાં તેમનું સન્માન કરવામાં આવ્યું હતું. કાર્યક્રમમાં સંસ્થાના પ્રમુખ પિનાકિની સંઘવીએ સ્વાગત પ્રવચન કરતાં જણાવ્યું હતું કે, કુટુંબની જવાબદારીઓ અને નાની દીકરીની સંભાળ સાથે મંજુલાબેન સંઘવીએ રાયપુર યુનિવર્સિટીમાંથી ઉચ્ચ શૈક્ષણિક ડિગ્રી મેળવી નોંધપાત્ર સિદ્ધિ હાંસલ કરી છે. તેમની આ સિદ્ધિ બદલ તેમણે મંજુલાબેનને અભિનંદન પાઠવ્યા હતા. મંડળના ખજાનચી ડૉ. પારુલબેન ગોગરીએ પણ મંજુલાબેનને શુભેચ્છા પાઠવી હતી. તેમણે જણાવ્યું હતું કે, મંજુલાબેનની સિદ્ધિથી તેમના પરિવારની સાથે મંડળ અને સમગ્ર જૈન સમાજનું નામ રોશન થયું છે. સન્માનના પ્રતિભાવમાં મંજુલાબેન સંઘવીએ પોતાની શૈક્ષણિક સિદ્ધિ પાછળ પરિવાર અને પતિ તરફથી મળેલા સહયોગ બદલ આભાર વ્યક્ત કર્યો હતો. આ પ્રસંગે જૈન સમાજરત્ન તથા શિક્ષણવિદ દિનેશભાઈ શાહે પણ મંજુલાબેનને શુભેચ્છાઓ પાઠવી હતી અને તેઓ ભવિષ્યમાં પણ ઉત્તરોત્તર પ્રગતિ કરતા રહે તેવી શુભકામનાઓ વ્યક્ત કરી હતી. કાર્યક્રમને સફળ બનાવવા પ્રમુખ પિનાકિની સંઘવી, ઉપપ્રમુખ રોશનીબેન શાહ, ખજાનચી ડૉ. પારુલબેન ગોગરી, સલાહકાર સીમાબેન લાલન, ઉષાબેન શાહ, શોભાબેન સંઘવી, વર્ષાબેન શાહ, જેની સંઘવી, રાહુલ સંઘવી, ભદ્રેશ સંઘવી અને ગાર્ગી ગોગરી સહિતના સભ્યોએ સહયોગ આપ્યો હતો. વધુ સમાચારો માટે અહીં ક્લિક કરો  

Read More »

માંડવી તપગચ્છ જૈન સંઘ દ્વારા રવિવારે યાત્રા પ્રવાસનું આયોજન

September 26, 2026 No Comments

માંડવી તપગચ્છ જૈન સંઘ દ્વારા રવિવારે યાત્રા પ્રવાસનું આયોજન Mandvi News દાતા પરિવારના સહયોગથી યોજાનાર યાત્રા પ્રવાસમાં શ્રાવક-શ્રાવિકાઓને કોઈ ચાર્જ નહીં શ્રી માંડવી શ્વેતાંબર મૂર્તિપૂજક તપગચ્છ જૈન સંઘના ઉપક્રમે દાતા પરિવારના સહયોગથી તા. 27 સપ્ટેમ્બર, રવિવારના રોજ યાત્રા પ્રવાસનું આયોજન કરવામાં આવ્યું છે. આ યાત્રા પ્રવાસના લાભાર્થી પરિવારો તરીકે માતૃશ્રી ઝવેરબેન દેવજીભાઈ મહેતા (ડગાળાવાલા) પરિવાર તથા માતૃશ્રી શાંતીબેન ઈશ્વરલાલ શાહ (વિવિધા) પરિવાર જોડાયા છે. આ અંગે માંડવી તપગચ્છ જૈન સંઘના પ્રમુખ ચંદ્રેશભાઈ શાહ તથા સંઘના પૂર્વ ટ્રસ્ટી અને મીડિયા કન્વીનર દિનેશભાઈ શાહે જણાવ્યું હતું કે, યાત્રા પ્રવાસ માટે સંઘનું પ્રસ્થાન 27 સપ્ટેમ્બરના રોજ સવારે 5 વાગ્યે માંડવીથી થશે. યાત્રા દરમિયાન સૌપ્રથમ સંઘ કટારીયા તીર્થ પહોંચશે, જ્યાં દર્શન-વંદન બાદ નવકારશી કરવામાં આવશે. ત્યારબાદ તપ પ્રભાવિકા પરમ પૂજ્ય સાધ્વીજી શ્રી હંસકીર્તિશ્રીજીના વંદન કરવામાં આવશે. કટારીયાથી સંઘ ભચાઉ પહોંચશે, જ્યાં પરમ પૂજ્ય સાધુ ભગવંત શ્રી તીર્થહેમ મહારાજ સાહેબના વંદન કર્યા બાદ પરમ પૂજ્ય સાધ્વીજી શ્રી જીનદિક્ષાશ્રીજી મહારાજ સાહેબ તથા સાધ્વીજી શ્રી જિનપ્રતિક્ષાશ્રીજી મહારાજ સાહેબના વંદન કરવામાં આવશે. ત્યારબાદ ગાંધીધામ ખાતે પરમ પૂજ્ય આચાર્ય ભગવંત શ્રી કીર્તિચંદ્ર સૂરીશ્વરજી મહારાજ સાહેબ આદિ ઠાણાના વંદન કરવામાં આવશે. ગાંધીધામથી સંઘ અંજાર પહોંચશે, જ્યાં પરમ પૂજ્ય આચાર્ય ભગવંત શ્રી વિમલપ્રભ સૂરીશ્વરજી મહારાજ સાહેબ આદિ ઠાણાના વંદન કરવામાં આવશે. યાત્રાના અંતિમ તબક્કામાં સંઘ કચ્છના પાટનગર ભુજ પહોંચશે. ત્યાં પરમ પૂજ્ય આચાર્ય ભગવંત શ્રી આનંદવર્ધન સૂરીશ્વરજી મહારાજ સાહેબ, પરમ પૂજ્ય આચાર્ય ભગવંત શ્રી આત્મદર્શન સૂરીશ્વરજી મહારાજ સાહેબ તથા પરમ પૂજ્ય આચાર્ય ભગવંત શ્રી રશ્મીરત્ન સૂરીશ્વરજી મહારાજ સાહેબ આદિ ઠાણાના વંદન કરવામાં આવશે. આ યાત્રા પ્રવાસમાં જોડાવા માટે કોઈપણ પ્રકારનો ચાર્જ રાખવામાં આવ્યો નથી. દાતા પરિવારની ભાવના છે કે વધુમાં વધુ શ્રાવક-શ્રાવિકાઓ આ ધાર્મિક યાત્રામાં જોડાય અને તેનો લાભ લે. યાત્રામાં જોડાવા ઇચ્છુક શ્રાવક-શ્રાવિકાઓએ માંડવીની તપગચ્છ પેઢીમાં વહેલી તકે પોતાના નામ નોંધાવવા વિનંતી કરવામાં આવી છે. વધુ સમાચારો માટે અહીં ક્લિક કરો

Read More »

દરશડીમાં વ્યસનમુક્તિ બેનર સ્પર્ધાનું પરિણામ જાહેર, વિદ્યાર્થીઓએ મેળવી સિદ્ધિ

September 26, 2026 No Comments

દરશડીમાં વ્યસનમુક્તિ બેનર સ્પર્ધાનું પરિણામ જાહેર, વિદ્યાર્થીઓએ મેળવી સિદ્ધિ Mandvi News દરશડી તથા મમાયમોરા શાળાના વિદ્યાર્થીઓએ ઉત્સાહભેર ભાગ લીધો હતો વ્યસનમુક્તિ અભિયાનના પ્રણેતા પ.પૂ. નરેશમુનિ “આનંદ” તથા તેમના શિષ્યરત્ન પ.પૂ. ઓજસમુનિ “મંગલ” મ.સા.ની પાવન નિશ્રામાં વ્યસનમુક્તિ અભિયાનના ઉપક્રમે તથા દરશડી ગામના સમસ્ત સમાજના સહયોગથી વ્યસનમુક્તિના બેનર બનાવવાની સ્પર્ધા યોજાઈ હતી. આ સ્પર્ધાનું પરિણામ જાહેર કરવામાં આવ્યું છે. સ્પર્ધામાં દરશડી ગામની પ્રાથમિક શાળા અને હાઈસ્કૂલના વિદ્યાર્થીઓ ઉપરાંત મમાયમોરા પ્રાથમિક શાળાના વિદ્યાર્થીઓએ પણ ઉત્સાહભેર ભાગ લીધો હતો. વિદ્યાર્થીઓએ બેનર દ્વારા વ્યસનમુક્તિનો સંદેશ સમાજ સુધી પહોંચાડવાનો પ્રયાસ કર્યો હતો. દરશડી પ્રાથમિક શાળાના વિજેતાઓ દરશડી પ્રાથમિક શાળામાં પ્રથમ ત્રણ ક્રમમાં વિજેતા થયેલા વિદ્યાર્થીઓમાં: પ્રથમ: મહેશ્વરી રોતિકા પ્રેમજીભાઈ – ધોરણ 6 દ્વિતીય: બજાણીયા સોયાના મોહમ્મદભાઈ – ધોરણ 8 તૃતીય: મહેશ્વરી મિરલ દિનેશભાઈ – ધોરણ 7 દરશડી હાઈસ્કૂલના વિજેતાઓ દરશડી હાઈસ્કૂલમાં પ્રથમ ત્રણ ક્રમ મેળવનાર વિદ્યાર્થીઓમાં: પ્રથમ: મહેશ્વરી નાત્યા આતુભાઈ – ધોરણ 9 દ્વિતીય: મહેશ્વરી સાક્ષી દિનેશભાઈ – ધોરણ 11 તૃતીય: નાયકા સુનિતા – ધોરણ 11 મમાયમોરા પ્રાથમિક શાળાના વિજેતાઓ મમાયમોરા પ્રાથમિક શાળામાં પ્રથમ ત્રણ ક્રમ મેળવનાર વિદ્યાર્થીઓમાં: પ્રથમ: ઉકાણી જૈની જીગ્નેશભાઈ – ધોરણ 8 દ્વિતીય: જબુઆણી ક્રિષ્ના રજનીભાઈ – ધોરણ 7 તૃતીય: રબારી હિરલ આશાભાઈ – ધોરણ 6 આ અંગે વ્યસનમુક્તિ અભિયાનના પ્રમુખ ડૉ. દિનેશભાઈ જોશી, ઉપપ્રમુખ જયેશભાઈ જે. શાહ તથા મંત્રી અને ખજાનચી દિનેશભાઈ મણીલાલ શાહે જણાવ્યું હતું કે, સ્પર્ધામાં વિદ્યાર્થીઓએ ઉત્સાહપૂર્વક ભાગ લઈ વ્યસનમુક્તિનો સકારાત્મક સંદેશ આપ્યો છે. તમામ વિજેતા વિદ્યાર્થીઓને પ.પૂ. નરેશમુનિ મ.સા., પ.પૂ. ઓજસમુનિ મ.સા., વ્યસનમુક્તિ અભિયાનના હોદ્દેદારો તેમજ દરશડી અને મમાયમોરા ગામના અગ્રણીઓ દ્વારા અભિનંદન અને શુભેચ્છાઓ પાઠવવામાં આવી હોવાનું વ્યસનમુક્તિ અભિયાનના મંત્રી તથા ખજાનચી દિનેશભાઈ શાહે અખબારી યાદીમાં જણાવ્યું છે. વધુ સમાચારો માટે અહીં ક્લિક કરો

Read More »

માંડવીમાં વડાપ્રધાન નરેન્દ્ર મોદીના જન્મદિન નિમિત્તે યોગ શિબિર યોજાઈ

September 26, 2026 No Comments

માંડવીમાં વડાપ્રધાન નરેન્દ્ર મોદીના જન્મદિન નિમિત્તે યોગ શિબિર યોજાઈ Mandvi News સત્સંગ આશ્રમ ખાતે યોગપ્રેમી સાધકો મોટી સંખ્યામા જોડાયા વડાપ્રધાન નરેન્દ્રભાઈ મોદીના જન્મદિન નિમિત્તે ગુજરાત રાજ્ય યોગ બોર્ડ દ્વારા માંડવીમાં વિશેષ યોગ શિબિરનું આયોજન કરવામાં આવ્યું હતું. ગુજરાત રાજ્ય યોગ બોર્ડના ચેરમેન શ્રી શિશપાલજી રાજપૂતના નેતૃત્વ હેઠળ તથા ઝોન કો-ઓર્ડીનેટર સુશ્રી વંદનાબેન રાજાણીના આદેશ અને જિલ્લા કો-ઓર્ડીનેટર શ્રી વિજયભાઈ શેઠના માર્ગદર્શન હેઠળ તા 17 સપ્ટેમ્બરના રોજ સાંજે માંડવીના સત્સંગ આશ્રમ ખાતે આ કાર્યક્રમ યોજાયો હતો. કાર્યક્રમમાં અતિથિવિશેષ તરીકે બ્રહ્મ સમાજ મહિલા પાંખના પ્રમુખ અપર્ણાબેન વ્યાસ, નગરપાલિકાના નગરસેવિકા શ્રીમતી જયશ્રીબેન મુછડીયા, એડવોકેટ ચંદાબેન જોશી તેમજ હોમગાર્ડઝ દળના સક્રિય સભ્ય જય મહેતા ઉપસ્થિત રહ્યા હતા. કાર્યક્રમના પ્રારંભે ઉપસ્થિત મહાનુભાવોના હસ્તે દીપ પ્રાગટ્ય કરવામાં આવ્યું હતું. ત્યારબાદ મહામૃત્યુંજય મંત્રના સામૂહિક મંત્રોચ્ચાર સાથે યોગ શિબિરનો પ્રારંભ થયો હતો. આ પ્રસંગે અપર્ણાબેન વ્યાસે યોગના મહત્વ તથા નિયમિત યોગાભ્યાસથી થતા વિવિધ ફાયદાઓ અંગે માર્ગદર્શન આપ્યું હતું. યોગ ટ્રેનર ઈન્દુબેન પટેલે વડાપ્રધાન શ્રી નરેન્દ્રભાઈ મોદીના જીવન અને જાહેર જીવનમાં તેમના કાર્ય અંગે પ્રાસંગિક ઉદબોધન કર્યું હતું. કાર્યક્રમ દરમિયાન ઉપસ્થિત મહાનુભાવોને ગુજરાત રાજ્ય યોગ બોર્ડ દ્વારા પ્રકાશિત ‘મેદસ્વિતા મુક્ત ગુજરાત’ પુસ્તિકા અર્પણ કરવામાં આવી હતી. સાથે જ શાલ ઓઢાડી મહાનુભાવોને સન્માનિત કરી સ્વાગત કરવામાં આવ્યું હતું. સમગ્ર કાર્યક્રમનું આયોજન માંડવી તાલુકાના યોગ કોચ ગાયત્રીબેન જોશી અને કલ્પનાબેન કષ્ટાના માર્ગદર્શન હેઠળ કરવામાં આવ્યું હતું. કાર્યક્રમનું સંચાલન ગાયત્રીબેન જોશીએ કર્યું હતું, જ્યારે આભારવિધિ કલ્પનાબેન કષ્ટાએ કરી હતી. યોગ શિબિરને સફળ બનાવવા યોગ ટ્રેનરો રંજનબેન સોની, ઈન્દુબેન પટેલ, સંગીતાબેન સોની, ક્રિષ્નાબેન જોશી, આરતીબેન પીઠડીયા, પ્રવિણાબેન ગઢવી તથા ભાવનાબેન પંડ્યાએ જહેમત ઉઠાવી હતી. માંડવી શહેરના યોગપ્રેમી સાધકો બહોળી સંખ્યામાં ઉપસ્થિત રહી યોગ શિબિરમાં જોડાયા હતા. યોગ ટ્રેનર જયભાઈ મહેતાએ જણાવ્યું હતું કે, કાર્યક્રમ દરમિયાન યોગપ્રત્યે લોકોમાં ઉત્સાહ અને સક્રિય ભાગીદારી જોવા મળી હતી. વધુ સમાચારો માટે અહીં ક્લિક કરો

Read More »

માંડવીમાં ‘SANRAKSHA – Orange the World’ અંતર્ગત ભવ્ય કાર રેલી યોજાશે

September 25, 2026 No Comments

માંડવીમાં ‘SANRAKSHA – Orange the World’ અંતર્ગત ભવ્ય કાર રેલી યોજાશે માંડવી: ઇનર વ્હીલ ક્લબ ઓફ માંડવી દ્વારા ઇનર વ્હીલ ડિસ્ટ્રિક્ટ 305ના માર્ગદર્શન હેઠળ ‘SANRAKSHA – Orange the World’ થીમ સાથે તા. 26 અને 27 સપ્ટેમ્બર, 2026 દરમિયાન બે દિવસીય ભવ્ય કાર રેલીનું આયોજન કરવામાં આવ્યું છે. ‘Grow | Glow | Go’ના સંદેશ સાથે યોજાનારી રેલીમાં 150થી વધુ સભ્યો અને સહભાગીઓ જોડાશે. રેલીનો મુખ્ય હેતુ મહિલા સુરક્ષા, સશક્તિકરણ, સ્વાસ્થ્ય, શિક્ષણ અને સામાજિક સેવા અંગે જનજાગૃતિ ફેલાવવાનો છે. ‘Orange the World’ અંતર્ગત નારંગી રંગ મહિલાઓ સામેની હિંસા વિરુદ્ધ જાગૃતિ, એકતા અને સંકલ્પનું પ્રતીક બની રહેશે. ‘Be The Voice’ અને ‘One Colour • One Voice • One Commitment’ જેવા સંદેશો દ્વારા મહિલાઓના સન્માન અને સુરક્ષા માટે સમાજને એક થવાનો સંદેશ આપવામાં આવશે. પ્રથમ દિવસે રજિસ્ટ્રેશન, નાસ્તો, સામાજિક જાગૃતિ માટે પ્રદર્શન, વર્કશોપ અને કાર ડેકોરેશન સહિતના કાર્યક્રમો યોજાશે. Eco-friendly decorationને પ્રોત્સાહન આપવામાં આવશે. સાંજે કચ્છી વાનગીઓ સાથે હાઈ-ટી અને સાંસ્કૃતિક કાર્યક્રમ બાદ પરંપરાગત ચણિયાચોળી ડ્રેસ કોડ સાથે ગરબા રાત્રિ યોજાશે. બીજા દિવસે નારંગી ટી-શર્ટ અને વાદળી જીન્સના ડ્રેસ કોડ સાથે શણગારેલી કારો સાથે ભવ્ય રેલી યોજાશે. રેલી દરમિયાન માંડવી બીચ ખાતે ‘SANRAKSHA’ જાગૃતિ કાર્યક્રમ યોજાશે, જેમાં વિવિધ મહિલા મંડળોની બહેનો ઉપસ્થિત રહેશે. મહિલાઓના સ્વાસ્થ્ય, સુરક્ષા, અધિકારો અને સશક્તિકરણ અંગે સંવાદ અને જાગૃતિ કાર્યક્રમ યોજાશે. આ પ્રસંગે માંડવીના PI શ્રી રાઠોડ, મેયર શ્રીમતી વર્ષાબેન જોશી તથા પલ્લવીબેન દવે સહિતના મહાનુભાવો ઉપસ્થિત રહી કાર્યક્રમને પ્રોત્સાહન આપશે. રેલીમાંથી એકત્રિત થનાર ફંડનો ઉપયોગ ઇનર વ્હીલ ક્લબની વિવિધ સેવાકીય પ્રવૃત્તિઓમાં કરવામાં આવશે. જેમાં ડાયાલિસિસ દર્દીઓને સહાય, સર્વાઇકલ કેન્સર રસીકરણ, Fit Girl Child પ્રોજેક્ટ તથા વિશેષ જરૂરિયાત ધરાવતી બાળાઓના શિક્ષણ માટે સહાયનો સમાવેશ થાય છે. આ સમગ્ર આયોજન PAP સુનિતા જૈન, ડિસ્ટ્રિક્ટ ચેરમેન વર્ષાબેન શાહ, ડિસ્ટ્રિક્ટ સેક્રેટરી અલકાબેન ભાર્ગવ, રેલી ચેરમેન ડૉ. કિંજલ શાહ, રેલી કન્વીનર રાચના શાહ, ક્લબ પ્રેસિડેન્ટ જૈમિની કોટક, સેક્રેટરી નીલમ ચાવડા તથા સમગ્ર ઇનર વ્હીલ ટીમના માર્ગદર્શન અને સહયોગથી કરવામાં આવશે. વધુ સમાચારો માટે અહીં ક્લિક કરો

Read More »

માંડવીમાં શ્રી જગન્નાથજીના બલી-બામન વેશના સાહાણમેળા દર્શન યોજાયા

September 25, 2026 No Comments

માંડવીમાં શ્રી જગન્નાથજીના બલી-બામન વેશના સાહાણમેળા દર્શન યોજાયા માંડવીના કાંઠાવારા નાકા પાસે આવેલ શ્રીશંખક્ષેત્ર-શ્રીજગન્નાથપુરી ચોક સ્થિત જગન્નાથપીઠ ખાતે મહાપ્રભુ શ્રી જગન્નાથજીના બલી-બામન વેશના સાહાણમેળા દર્શનનું આયોજન કરવામાં આવ્યું હતું. આ ધાર્મિક પ્રસંગે માંડવી નગર સેવા સદનના કાઉન્સિલરો, વિવિધ મોરચાના હોદ્દેદારો અને સભ્યો સહિત માંડવી-મુન્દ્રાના ધારાસભ્ય અનિરુદ્ધભાઈ દવે તથા નવા નિમાયેલા નગર અધ્યક્ષ વર્ષાબેન વિનેશ જોશી વિશેષ ઉપસ્થિત રહ્યા હતા. ઉપસ્થિત મહાનુભાવોએ શ્રીજીઉના બલી-બામન વેશમાં આરતી કરી અને દિવ્ય દર્શનનો લાભ લીધો હતો. ધારાસભ્ય અનિરુદ્ધભાઈ દવેએ શ્રીજીઉ સમીપે ભક્તવૃંદ સમક્ષ શ્રીશંખક્ષેત્ર-જગન્નાથપુરી તીર્થધામ તથા જગન્નાથ પ્રભુના મહિમાનું ગાન કર્યું હતું. બલી-બામન વેશના દર્શનથી ભક્તોમાં ભક્તિભાવ છવાયો હતો. કાર્યક્રમમાં પધારેલા મહાનુભાવો અને આગેવાનોનું પીળા રંગના ઉપરણા દ્વારા સન્માન કરવામાં આવ્યું હતું. સાહાણમેળા દર્શન દરમિયાન મોટી સંખ્યામાં માંડવી નગરજનોએ જગન્નાથજીના દર્શન કરી ધન્યતા અનુભવી હતી. સમગ્ર વાતાવરણ ‘હરિબોલ’ અને ‘જય જગન્નાથ’ના જયઘોષથી ગુંજી ઉઠ્યું હતું. આ અંગે ઉત્સવના મુખ્ય આયોજક રવિન્દ્ર વી. સોલંકી (રવિભાઈ જગન્નાથપુરી ઓરિસ્સાવાળા)ની યાદીમાં જણાવાયું હતું. વધુ સમાચારો માટે અહીં ક્લિક કરો

Read More »

કચ્છમાં જળસંરક્ષણને મળશે નવી દિશા, દામજીભાઈ એકરવાલાની સ્મૃતિમાં ‘જલ-મિત્ર’ અભિયાન

September 25, 2026 No Comments

કચ્છમાં જળસંરક્ષણને મળશે નવી દિશા, દામજીભાઈ એકરવાલાની સ્મૃતિમાં ‘જલ-મિત્ર’ અભિયાન કચ્છ જેવા પાણીની અછત ધરાવતા વિસ્તારમાં જળસંરક્ષણનું મહત્વ ખૂબ વધારે છે. વરસાદી પાણીનો સંગ્રહ, પાણીનો કરકસરપૂર્વક ઉપયોગ અને ભવિષ્ય માટે જળસ્રોતોને સુરક્ષિત રાખવા માટે સતત લોકજાગૃતિ જરૂરી છે. આ દિશામાં કચ્છમાં જળસંરક્ષણ સાથે જોડાયેલી એક નવી પહેલ સામે આવી છે. જળસંરક્ષણના ક્ષેત્રે કાર્ય કરનાર દામજીભાઈ એકરવાલાની સ્મૃતિને કેન્દ્રમાં રાખીને ‘જલ-મિત્ર’ સ્કૂલ વોટર ઓડિટ અભિયાન શરૂ કરવાની પહેલ કરવામાં આવી છે. આ પહેલનો મુખ્ય ઉદ્દેશ શાળાના વિદ્યાર્થીઓને પાણીના મહત્વ સાથે જોડવાનો અને શાળા સ્તરેથી જ પાણી બચાવવાની ટેવ વિકસાવવાનો છે. શાળાઓમાં પાણીના ઉપયોગ પર થશે ધ્યાન ‘જલ-મિત્ર’ અભિયાન હેઠળ શાળાઓમાં પાણીનો ઉપયોગ કેવી રીતે થાય છે તેની સમજ મેળવવા પર ભાર મૂકવામાં આવશે. પાણી ક્યાં વપરાય છે, ક્યાં બગાડ થવાની શક્યતા છે અને પાણીનો ઉપયોગ વધુ અસરકારક રીતે કેવી રીતે કરી શકાય તેવા મુદ્દાઓ વિદ્યાર્થીઓ સમક્ષ લાવવામાં આવશે. આ પ્રકારની પ્રવૃત્તિથી વિદ્યાર્થીઓ માત્ર પાણી બચાવવાની વાત સાંભળશે નહીં, પરંતુ પોતાના આસપાસના પાણીના વપરાશને સમજવાની તક પણ મેળવી શકશે. વિદ્યાર્થીઓ બનશે જળસંરક્ષણના સંદેશવાહક જળસંરક્ષણને માત્ર સરકારી તંત્ર કે કોઈ એક સંસ્થાની જવાબદારી ન રાખીને સમાજના દરેક વર્ગ સુધી પહોંચાડવાની જરૂરિયાત છે. તેમાં વિદ્યાર્થીઓની ભૂમિકા પણ મહત્વપૂર્ણ બની શકે છે. શાળામાં પાણી બચાવવાની ટેવ વિકસાવ્યા બાદ વિદ્યાર્થીઓ આ સંદેશ પોતાના પરિવાર અને આસપાસના લોકો સુધી પહોંચાડી શકે છે. નાની ઉંમરથી પાણીનું મહત્વ સમજવાથી ભવિષ્યમાં પાણીના સંરક્ષણ અંગે વધુ જવાબદાર અભિગમ વિકસે તેવી આશા છે. કચ્છ માટે પાણી બચાવવું કેમ જરૂરી? કચ્છમાં વરસાદનું પ્રમાણ અને પાણીની ઉપલબ્ધતા અંગે પડકારો રહે છે. આવી પરિસ્થિતિમાં મળતા વરસાદી પાણીને સાચવવું અને ભૂગર્ભ જળ સહિતના જળસ્રોતોનું જતન કરવું જરૂરી બને છે. પાણીનો બિનજરૂરી વપરાશ અટકાવવો, લીકેજ દૂર કરવું, વરસાદી પાણીનો યોગ્ય ઉપયોગ કરવો અને લોકોમાં પાણી બચાવવાની સમજ વધારવી જેવા નાના પગલાં પણ લાંબા ગાળે ઉપયોગી સાબિત થઈ શકે છે. દામજીભાઈ એકરવાલાની સ્મૃતિને સમર્પિત પહેલ ‘જલ-મિત્ર’ અભિયાનને દામજીભાઈ એકરવાલાની જળસંરક્ષણ સાથે જોડાયેલી વિચારધારાને આગળ વધારવાના પ્રયાસ તરીકે જોવામાં આવી રહ્યું છે. તેમની સ્મૃતિમાં શાળાના વિદ્યાર્થીઓને જળસંરક્ષણ સાથે જોડવાનો આ પ્રયાસ નવી પેઢીમાં પાણી પ્રત્યે જવાબદારીની ભાવના વિકસાવવાની દિશામાં મહત્વપૂર્ણ બની શકે છે. શાળાથી શરૂ થતી જળજાગૃતિ જો પરિવાર અને સમાજ સુધી પહોંચે તો પાણી બચાવવાનો સંદેશ વધુ વ્યાપક બની શકે છે. કચ્છ જેવા વિસ્તારમાં જળસંરક્ષણને રોજિંદા જીવનનો ભાગ બનાવવો આવનારા સમય માટે પણ જરૂરી છે.   વધુ સમાચારો માટે અહીં ક્લિક કરો

Read More »

કચ્છ માટે મોટી ગ્રીન એનર્જી પહેલ: કંડલા પોર્ટ ખાતે ₹2,300 કરોડના ઈ-મિથેનોલ પ્લાન્ટનો શિલાન્યાસ

September 25, 2026 No Comments

કચ્છ માટે મોટી ગ્રીન એનર્જી પહેલ: કંડલા પોર્ટ ખાતે ₹2,300 કરોડના ઈ-મિથેનોલ પ્લાન્ટનો શિલાન્યાસ Deendayal Port Authority 21 સપ્ટેમ્બર 2026: દીનદયાળ પોર્ટ ઓથોરિટી (DPA), કંડલા અને આસામ પેટ્રો-કેમિકલ્સ લિમિટેડ (APCL)ના સંયુક્ત ઉપક્રમે કંડલા ખાતે 150 TPD ઈ-મિથેનોલ પ્લાન્ટ વિકસાવવાની મહત્વાકાંક્ષી પહેલ હાથ ધરવામાં આવી છે. આ પ્રોજેક્ટના ફાઉન્ડેશન સ્ટોન લેઇંગ સેરેમનીનું આયોજન 26 સપ્ટેમ્બર, 2026ના રોજ DPA એક્ઝિબિશન ગ્રાઉન્ડ, ગાંધીધામ ખાતે કરવામાં આવશે. Deendayal Port Authority આ પ્રસંગે ગુજરાતના મુખ્યમંત્રી ભૂપેન્દ્ર પટેલ, કેન્દ્રીય બંદરો, શિપિંગ અને જળમાર્ગ મંત્રી સર્વાનંદ સોનોવાલ તથા આસામના મુખ્યમંત્રી ડૉ. હિમંત બિસ્વા શર્મા દ્વારા પ્રોજેક્ટનો શિલાન્યાસ કરવામાં આવશે. ₹2,300 કરોડનું રોકાણ, 3,500થી વધુ રોજગારની અપેક્ષા આશરે ₹2,300 કરોડના રોકાણથી વિકસિત થનારો 150 TPD ઈ-મિથેનોલ પ્લાન્ટ ભારતના ગ્રીન એનર્જી ટ્રાન્ઝિશન માટે મહત્વપૂર્ણ પહેલ માનવામાં આવી રહ્યો છે. પ્રોજેક્ટના અમલીકરણથી 3,500થી વધુ પ્રત્યક્ષ અને પરોક્ષ રોજગારની તકો ઊભી થવાની અપેક્ષા છે. આ રોજગારીની તકોનો લાભ યુવાનો ઉપરાંત કુશળ કામદારો, એન્જિનિયરો, ટ્રાન્સપોર્ટર્સ, સપ્લાયર્સ અને અન્ય સંકળાયેલા ક્ષેત્રોને મળવાની શક્યતા છે. સાથે જ કચ્છના ઔદ્યોગિક અને આર્થિક વિકાસને પણ વેગ મળવાની અપેક્ષા છે. ગ્રીન ફ્યુઅલ અને ગ્રીન શિપિંગને મળશે વેગ દીનદયાળ પોર્ટ ખાતે વિકસાવવામાં આવનારો આ પ્લાન્ટ ઈ-મિથેનોલ જેવા સ્વચ્છ ઈંધણના ઉપયોગને પ્રોત્સાહન આપશે. ખાસ કરીને દરિયાઈ પરિવહન ક્ષેત્રમાં ગ્રીન એનર્જીના ઉપયોગને વેગ આપવા માટે આ પ્રોજેક્ટ મહત્વપૂર્ણ બની શકે છે. ઈ-મિથેનોલ આધારિત ઈંધણના ઉપયોગથી આયાતી ફોસિલ ફ્યુઅલ પરની નિર્ભરતા ઘટાડવા તથા વધુ સ્વચ્છ અને ટકાઉ શિપિંગ વ્યવસ્થાને પ્રોત્સાહન આપવાના પ્રયાસોને બળ મળશે. ગુજરાત અને આસામની ઔદ્યોગિક ક્ષમતાઓનું સંગમ આ પ્રોજેક્ટમાં આસામ પેટ્રો-કેમિકલ્સ લિમિટેડની ઔદ્યોગિક ક્ષમતા અને દીનદયાળ પોર્ટ ઓથોરિટીની વ્યૂહાત્મક દરિયાઈ સુવિધાઓનું સંયોજન જોવા મળશે. ગુજરાત અને આસામ વચ્ચેની આ ઔદ્યોગિક ભાગીદારી દેશના ગ્રીન ફ્યુઅલ ઇકોસિસ્ટમને વધુ મજબૂત બનાવવાની દિશામાં મહત્વપૂર્ણ પગલું બની શકે છે. અનેક મહાનુભાવો રહેશે ઉપસ્થિત શિલાન્યાસ સમારોહમાં કચ્છ-મોરબીના સાંસદ વિનોદભાઈ ચાવડા, ગાંધીધામના ધારાસભ્ય માલતીબેન મહેશ્વરી, દીનદયાળ પોર્ટ ઓથોરિટીના અધ્યક્ષ સુશીલ કુમાર સિંહ, IRSME તથા આસામ પેટ્રો-કેમિકલ્સ લિમિટેડના અધ્યક્ષ બિકુલ ડેકા સહિતના મહાનુભાવો ઉપસ્થિત રહેશે. આ પ્રોજેક્ટ ભારત સરકારના ગ્રીન એનર્જી, ટકાઉ બંદર વિકાસ અને ઊર્જા આત્મનિર્ભરતાના દિશા-વિઝનને આગળ ધપાવતી પહેલ તરીકે જોવામાં આવી રહ્યો છે. કંડલા ખાતે ઈ-મિથેનોલ પ્લાન્ટની સ્થાપના કચ્છના બંદર અને ઔદ્યોગિક ક્ષેત્રને ગ્રીન એનર્જી ક્ષેત્ર સાથે વધુ મજબૂત રીતે જોડવામાં મહત્વની ભૂમિકા ભજવી શકે છે. વધુ સમાચારો માટે અહીં ક્લિક કરો

Read More »

ખાવડા CHCની સાંસદ વિનોદભાઈ ચાવડાએ લીધી મુલાકાત, આરોગ્ય સેવાઓની કરી સમીક્ષા

September 24, 2026 No Comments

ખાવડા CHCની સાંસદ વિનોદભાઈ ચાવડાએ લીધી મુલાકાત, આરોગ્ય સેવાઓની કરી સમીક્ષા ભુજ: સેવા મેરા યોગદાન અભિયાન અંતર્ગત કચ્છ-મોરબી લોકસભા મતવિસ્તારના સાંસદ વિનોદભાઈ ચાવડાએ ખાવડા સામૂહિક આરોગ્ય કેન્દ્ર (CHC)ની મુલાકાત લીધી હતી. આ મુલાકાત દરમિયાન તેમણે આરોગ્ય કેન્દ્ર ખાતે નાગરિકોને આપવામાં આવતી વિવિધ આરોગ્ય સેવાઓ અને ઉપલબ્ધ સુવિધાઓ અંગે માહિતી મેળવી હતી. મુલાકાત દરમિયાન આગેવાન દેવજીભાઈ વરચંદ તથા હિતેશભાઈ હિંમતલાલ ખંડોર પણ ઉપસ્થિત રહ્યા હતા. સાંસદે આરોગ્ય કેન્દ્રના તબીબો અને કર્મચારીઓ સાથે ચર્ચા કરી હતી અને અહીં દર્દીઓને મળતી સારવાર અંગે જાણકારી મેળવી હતી. આરોગ્ય સેવાઓ અને દવાઓની ઉપલબ્ધતાની માહિતી મેળવી ખાવડા CHC ખાતે ઉપલબ્ધ આરોગ્ય સુવિધાઓ, દર્દીઓની સારવાર, જરૂરી દવાઓનો જથ્થો તેમજ અન્ય આરોગ્યલક્ષી વ્યવસ્થાઓ અંગે સાંસદે વિગતવાર માહિતી મેળવી હતી. આરોગ્ય વિભાગના અધિકારીઓ અને કર્મચારીઓ દ્વારા કેન્દ્રમાં ચાલી રહેલી કામગીરી અંગે તેમને માહિતી આપવામાં આવી હતી. ખાવડા સહિતના આસપાસના ગ્રામ્ય અને અંતરિયાળ વિસ્તારોના લોકોને સમયસર આરોગ્ય સેવા મળી રહે તે માટે કરવામાં આવતી કામગીરી અંગે પણ ચર્ચા કરવામાં આવી હતી. તબીબો અને આરોગ્ય કર્મચારીઓ સાથે સંવાદ સાંસદ વિનોદભાઈ ચાવડાએ CHCમાં ફરજ બજાવતા તબીબો તથા આરોગ્ય કર્મચારીઓ સાથે મુલાકાત કરી હતી. તેમણે આરોગ્ય સેવાઓની વ્યવસ્થા, દર્દીઓને મળતી સુવિધાઓ અને સ્થાનિક સ્તરે આરોગ્ય ક્ષેત્રે કરવામાં આવતી કામગીરી અંગે માહિતી મેળવી હતી. અંતરિયાળ વિસ્તારમાં આવેલા આરોગ્ય કેન્દ્રો સ્થાનિક લોકો માટે મહત્વપૂર્ણ હોવાથી ત્યાં ઉપલબ્ધ સેવાઓને વધુ સુલભ અને અસરકારક બનાવવા માટે સતત કામગીરી જરૂરી હોવાનું પણ જણાવાયું હતું. મુલાકાતના અંતે સાંસદે આરોગ્ય કર્મચારીઓની કામગીરીની પ્રશંસા કરી હતી અને ખાવડા તથા આસપાસના વિસ્તારોના નાગરિકોને સારી અને સરળતાથી આરોગ્ય સેવાઓ મળી રહે તે માટે સતત પ્રયાસો ચાલુ રાખવા અનુરોધ કર્યો હતો.  વધુ સમાચારો માટે અહીં ક્લિક કરો

Read More »

કચ્છમાં બેંક હડતાળથી રૂ.1500 કરોડના વ્યવહારો પર અસરની શક્યતા, 28થી 30 સપ્ટેમ્બર સુધી રાષ્ટ્રવ્યાપી હડતાળ

September 24, 2026 No Comments

કચ્છમાં બેંક હડતાળથી રૂ.1500 કરોડના વ્યવહારો પર અસરની શક્યતા, 28થી 30 સપ્ટેમ્બર સુધી રાષ્ટ્રવ્યાપી હડતાળ બેંક કર્મચારી સંગઠનો દ્વારા 28થી 30 સપ્ટેમ્બર, 2026 દરમિયાન ત્રણ દિવસની દેશવ્યાપી બેંક હડતાળનું એલાન કરવામાં આવ્યું છે. હડતાળના કારણે કચ્છ જિલ્લામાં બેંકની શાખાકીય કામગીરી અને મોટા પાયે નાણાકીય વ્યવહારો પર અસર થવાની શક્યતા છે. સ્થાનિક અહેવાલ મુજબ, કચ્છમાં અંદાજે રૂ.1500 કરોડના વ્યવહારો ખોરવાઈ શકે છે યુનાઇટેડ ફોરમ ઓફ બેંક યુનિયન્સ (UFBU) દ્વારા વિવિધ પડતર માંગણીઓને લઈને 28, 29 અને 30 સપ્ટેમ્બરના રોજ હડતાળનું આયોજન કરવામાં આવ્યું છે. આ સમયગાળા દરમિયાન બેંક શાખાઓમાં કર્મચારીઓની હાજરી અને કામગીરી પ્રભાવિત થવાથી રોકડ જમા-ઉપાડ, ચેક સંબંધિત કામકાજ, દસ્તાવેજી કામગીરી સહિતની શાખા આધારિત સેવાઓમાં વિલંબ થઈ શકે છે. કચ્છના વેપાર-ધંધા પર પણ અસરની શક્યતા કચ્છમાં વેપાર-ધંધા સાથે જોડાયેલા મોટા પ્રમાણમાં નાણાકીય વ્યવહારો બેંકો મારફતે થાય છે. હડતાળ દરમિયાન શાખાકીય કામગીરી મર્યાદિત રહે તો વેપારીઓ, ઉદ્યોગકારો અને અન્ય ગ્રાહકોને બેંકિંગ કામકાજમાં મુશ્કેલી પડી શકે છે. ખાસ કરીને ચેક ક્લિયરન્સ, રોકડ વ્યવહાર અને બેંક કર્મચારીની સીધી મદદ જરૂરી હોય તેવા કામોમાં વિલંબ થવાની શક્યતા છે. બેંકિંગ સંગઠનોની હડતાળના કારણે 26 સપ્ટેમ્બર ચોથો શનિવાર હોવાથી અને ત્યારબાદ હડતાળ શરૂ થતી હોવાથી સતત ઘણા દિવસ સુધી શાખાકીય સેવાઓ પર અસર થવાની સ્થિતિ ઊભી થઈ છે. જોકે, સામાન્ય ગ્રાહકોને રાહત આપવા માટે 27 સપ્ટેમ્બર, રવિવારે જાહેર ક્ષેત્રની બેંકો અને પ્રાદેશિક ગ્રામિણ બેંકો ચાલુ રાખવાનો નિર્ણય લેવામાં આવ્યો છે. ગ્રાહકો માટે મહત્વની સૂચના SBI સહિત કેટલીક બેંકોએ ગ્રાહકોને હડતાળ પહેલાં જરૂરી શાખાકીય કામ પૂર્ણ કરી લેવા સલાહ આપી છે. હડતાળ દરમિયાન ATM, UPI, મોબાઇલ બેંકિંગ અને ઇન્ટરનેટ બેંકિંગ જેવી ડિજિટલ સેવાઓનો ઉપયોગ કરી શકાશે, જોકે ચોક્કસ સેવા તેની બેંકની કામગીરી અને ઉપલબ્ધતા પર આધારિત રહેશે. આ ઉપરાંત, સરકાર દ્વારા બેંક કર્મચારી સંગઠનોને હડતાળ ટાળવા અને ચર્ચા દ્વારા પ્રશ્નોનું નિરાકરણ લાવવા અપીલ પણ કરવામાં આવી છે. તેથી હડતાળની તારીખો દરમિયાન અંતિમ સ્થિતિમાં ફેરફાર થાય છે કે નહીં તેના પર પણ નજર રહેશે. વધુ સમાચારો માટે અહીં ક્લિક કરો

Read More »