October 28, 2026 7:50 pm

Category: સ્વાસ્થ્ય

એકતાનગરમાં આરોગ્ય સેવાઓ ‘ઓન વ્હીલ્સ’: પાંચ બાઈક એમ્બ્યુલન્સથી શ્રમિકોને સ્થળ પર જ મળશે નિઃશુલ્ક સારવાર

October 24, 2026 1 Comment

એકતાનગરમાં આરોગ્ય સેવાઓ ‘ઓન વ્હીલ્સ’: પાંચ બાઈક એમ્બ્યુલન્સથી શ્રમિકોને સ્થળ પર જ મળશે નિઃશુલ્ક સારવાર Free Medical Treatment રાષ્ટ્રીય એકતા દિવસની ઉજવણીની તૈયારીઓ વચ્ચે શ્રમિકો અને કર્મચારીઓને તાત્કાલિક પ્રાથમિક આરોગ્યસેવા મળી રહે તે માટે નર્મદા જિલ્લા આરોગ્ય વિભાગ દ્વારા એક સરાહનીય પહેલ કરવામાં આવી છે. એકતાનગરમાં આરોગ્ય સેવાઓને વધુ સુલભ બનાવવા માટે પાંચ બાઈક એમ્બ્યુલન્સ કાર્યરત કરવામાં આવી છે. આ પહેલથી સામાન્ય આરોગ્ય સમસ્યાઓ માટે લોકોને સ્થળ પર જ પ્રાથમિક સારવાર મળી શકશે.   મેડિકલ ઓફિસર અને પેરામેડિકલ સ્ટાફની ટીમ તૈનાત રાષ્ટ્રીય એકતા દિવસની પૂર્વતૈયારીઓમાં મોટી સંખ્યામાં શ્રમિકો અને કર્મચારીઓ વિવિધ કામગીરીમાં જોડાયેલા છે. આ દરમિયાન તેમને કોઈ સામાન્ય શારીરિક તકલીફ થાય તો તાત્કાલિક તબીબી સહાય મળી રહે તે હેતુથી બાઈક એમ્બ્યુલન્સની વ્યવસ્થા કરવામાં આવી છે. આ પાંચ બાઈક એમ્બ્યુલન્સ મેડિકલ ઓફિસર અને પેરામેડિકલ સ્ટાફથી સજ્જ છે. ટીમ દ્વારા જરૂરિયાત મુજબ સંબંધિત સ્થળે પહોંચીને પ્રાથમિક સારવાર પૂરી પાડવામાં આવશે. આ વ્યવસ્થાથી આરોગ્યસેવા માટે સમયસર મદદ મળી રહેવાની સાથે કામદારોને પણ રાહત મળશે.   સવારે 9થી સાંજે 5 વાગ્યા સુધી સેવા   આરોગ્ય વિભાગની આ વિશેષ વ્યવસ્થા હેઠળ બાઈક એમ્બ્યુલન્સ ટીમો દરરોજ સવારે 9 વાગ્યાથી સાંજે 5 વાગ્યા સુધી કાર્યરત રહેશે. ખાંસી, શરદી, તાવ, શરીરમાં દુખાવો સહિતની સામાન્ય આરોગ્યલક્ષી તકલીફોમાં સ્થળ પર જ પ્રાથમિક તબીબી સહાય આપવામાં આવશે. આ સેવા નિઃશુલ્ક ઉપલબ્ધ રહેશે, જેથી પૂર્વતૈયારીઓમાં જોડાયેલા શ્રમિકો અને કર્મચારીઓને નાની–મોટી તકલીફો માટે તાત્કાલિક મદદ મળી શકે. ઝડપી આરોગ્યસેવા માટે ઉપયોગી પહેલ   એકતાનગર જેવા વિસ્તારમાં મોટા આયોજનની તૈયારીઓ દરમિયાન સ્થળ પર આરોગ્યસેવાની ઉપલબ્ધતા મહત્વપૂર્ણ બની રહે છે. બાઈક એમ્બ્યુલન્સની મદદથી જરૂરિયાતવાળા સ્થળે ઝડપથી પહોંચી શકાય છે, જેના કારણે સામાન્ય આરોગ્ય સમસ્યાઓમાં પ્રાથમિક સારવાર મેળવવાનું સરળ બની શકે છે. નર્મદા જિલ્લા આરોગ્ય વિભાગની આ પહેલનો મુખ્ય ઉદ્દેશ્ય રાષ્ટ્રીય એકતા દિવસની તૈયારીઓમાં જોડાયેલા શ્રમિકો અને કર્મચારીઓના સ્વાસ્થ્યની કાળજી રાખવાનો છે. સ્થળ પર જ તબીબી સહાય ઉપલબ્ધ થવાથી સમયસર સારવાર મેળવવામાં મદદ મળશે અને આરોગ્યસેવાઓ વધુ સુલભ બનશે. વધુ સમાચારો માટે અહીં ક્લિક કરો

Read More »

ગુજરાતમાં એર એમ્બ્યુલન્સ સેવાની મોટી સિદ્ધિ: અત્યાર સુધીમાં 98 ફ્લાઇટ મિશન પૂર્ણ

October 22, 2026 No Comments

ગુજરાતમાં એર એમ્બ્યુલન્સ સેવાની મોટી સિદ્ધિ: અત્યાર સુધીમાં 98 ફ્લાઇટ મિશન પૂર્ણ Gujarat Air Ambulance Service ગુજરાતમાં ગંભીર બીમારી અથવા ઇમરજન્સીની સ્થિતિમાં દર્દીઓને સમયસર તબીબી સારવાર મળી રહે તે માટે એર એમ્બ્યુલન્સ સેવા મહત્વપૂર્ણ ભૂમિકા ભજવી રહી છે. રાજ્ય સરકાર દ્વારા સંચાલિત આ વિશેષ સેવા અંતર્ગત અત્યાર સુધીમાં કુલ 98 ફ્લાઇટ મિશન પૂર્ણ કરવામાં આવ્યાં હોવાનું જણાવાયું છે. ઇમરજન્સીમાં દર્દીઓ માટે ઉપયોગી સેવા મુખ્યમંત્રી ભૂપેન્દ્ર પટેલના નેતૃત્વ હેઠળ રાજ્યમાં ઇમરજન્સી હેલ્થકેર સેવાઓને વધુ અસરકારક બનાવવાના પ્રયાસો થઈ રહ્યા છે. એર એમ્બ્યુલન્સ દ્વારા ગંભીર સ્થિતિમાં રહેલા દર્દીઓને જરૂરી તબીબી સહાય સાથે એક સ્થળેથી બીજા સ્થળે પહોંચાડવાની સુવિધા ઉપલબ્ધ કરાવવામાં આવે છે. દર્દીની સ્થિતિ પ્રમાણે તબીબી વ્યવસ્થા એર એમ્બ્યુલન્સમાં દર્દીની જરૂરિયાત અને તબીબી સ્થિતિને ધ્યાનમાં રાખીને જરૂરી વ્યવસ્થા કરવામાં આવે છે. કેસની ગંભીરતા, મુસાફરીનું અંતર અને દર્દીને કયા સ્થળે પહોંચાડવાનો છે તે મુજબ ડોક્ટર, મેડિકલ સ્ટાફ અને જરૂરી તબીબી સાધનોની વ્યવસ્થા કરવામાં આવે છે. આ સુવિધાનો મુખ્ય ઉદ્દેશ ગંભીર દર્દીઓને સમયસર યોગ્ય સારવાર મળી રહે અને ઇમરજન્સીના સમયે પરિવહન માટે થતો વિલંબ ઓછો કરી શકાય તે છે. ચોવીસ કલાક ઉપલબ્ધ રહેતી સેવા આરોગ્ય કટોકટીમાં સમય ખૂબ જ મહત્ત્વનો હોય છે. આવી પરિસ્થિતિમાં એર એમ્બ્યુલન્સ સેવા દર્દીઓને જરૂરી તબીબી સહાય સાથે ઝડપથી ગંતવ્ય સુધી પહોંચાડવામાં ઉપયોગી બની શકે છે. રાજ્યમાં અત્યાર સુધીમાં પૂર્ણ થયેલાં 98 ફ્લાઇટ મિશન આ સેવાની કામગીરી અંગે મહત્ત્વપૂર્ણ આંકડો છે. વધુ સમાચારો માટે અહીં ક્લિક કરો

Read More »

વિશ્વ માનસિક સ્વાસ્થ્ય દિવસ 2026: માનસિક તંદુરસ્તી પણ એટલી જ જરૂરી, જાણો તણાવથી બચવાના સરળ ઉપાયો

October 10, 2026 No Comments

વિશ્વ માનસિક સ્વાસ્થ્ય દિવસ 2026: માનસિક તંદુરસ્તી પણ એટલી જ જરૂરી, જાણો તણાવથી બચવાના સરળ ઉપાયો World Mental Health Day 2026 ,10 ઓક્ટોબર વિશ્વ માનસિક સ્વાસ્થ્ય દિવસ તરીકે ઉજવવામાં આવે છે. આ દિવસનો મુખ્ય હેતુ લોકોમાં માનસિક સ્વાસ્થ્ય અંગે જાગૃતિ લાવવાનો, માનસિક સમસ્યાઓ વિશેની ગેરમાન્યતાઓ દૂર કરવાનો અને જરૂરિયાતમંદ લોકોને યોગ્ય મદદ મેળવવા માટે પ્રોત્સાહિત કરવાનો છે. આજના ઝડપી જીવનમાં કામનું દબાણ, આર્થિક મુશ્કેલીઓ, પારિવારિક સમસ્યાઓ અને ભવિષ્યની ચિંતા જેવી બાબતો વ્યક્તિના માનસિક સ્વાસ્થ્યને અસર કરી શકે છે. તેથી શારીરિક સ્વાસ્થ્યની સાથે માનસિક સ્વાસ્થ્યનું ધ્યાન રાખવું પણ ખૂબ જરૂરી છે. વિશ્વ માનસિક સ્વાસ્થ્ય દિવસનો ઇતિહાસ વિશ્વ માનસિક સ્વાસ્થ્ય દિવસની શરૂઆત વર્ષ 1992માં વર્લ્ડ ફેડરેશન ફોર મેન્ટલ હેલ્થ દ્વારા કરવામાં આવી હતી. ત્યારથી દર વર્ષે 10 ઓક્ટોબરના રોજ આ દિવસ ઉજવવામાં આવે છે. આ દિવસ દ્વારા વિશ્વભરમાં માનસિક સ્વાસ્થ્યનું મહત્ત્વ સમજાવવામાં આવે છે. માનસિક સમસ્યાઓનો સામનો કરતા લોકોને સહાનુભૂતિ, યોગ્ય સારવાર અને જરૂરી સહાય મળી રહે તે માટે પણ જાગૃતિ ફેલાવવામાં આવે છે. વર્ષ 2026ની થીમ શું છે? વિશ્વ માનસિક સ્વાસ્થ્ય દિવસ 2026ની થીમ છે “Lived Experiences Heard: Real Voices, Real Change”. ગુજરાતીમાં તેનો અર્થ થાય છે — “અનુભવોને સાંભળીએ: સાચા અવાજો, વાસ્તવિક પરિવર્તન.” આ થીમનો મુખ્ય સંદેશ એ છે કે માનસિક સ્વાસ્થ્યની સમસ્યાઓનો સામનો કરી રહેલા લોકોના અનુભવોને સાંભળવા જોઈએ. તેમની વાતને મહત્ત્વ આપવું જોઈએ અને માનસિક સ્વાસ્થ્ય સેવાઓ તથા નીતિઓ ઘડવામાં તેમના અભિપ્રાયનો સમાવેશ કરવો જોઈએ. માનસિક સ્વાસ્થ્ય બગડવાનાં મુખ્ય કારણો વ્યક્તિના માનસિક સ્વાસ્થ્ય પર વિવિધ પરિબળોની અસર થઈ શકે છે. તેમાં મુખ્યત્વે નીચેની બાબતોનો સમાવેશ થાય છે: નોકરી અથવા વ્યવસાયને લગતું દબાણ. આર્થિક મુશ્કેલીઓ અને દેવાનો બોજ. પારિવારિક વિવાદો અને સંબંધોમાં તણાવ. એકલતા અને સામાજિક સહકારનો અભાવ. ભવિષ્ય અંગે સતત ચિંતા. ઊંઘનો અભાવ અને અનિયમિત જીવનશૈલી. લાંબા સમય સુધી ચાલતી શારીરિક બીમારી. આ સમસ્યાઓ દરેક વ્યક્તિને એકસરખી રીતે અસર કરતી નથી. જોકે, લાંબા સમય સુધી તણાવ રહે તો માનસિક અને શારીરિક સ્વાસ્થ્ય બંને પર અસર થઈ શકે છે. માનસિક તણાવનાં લક્ષણો કેવી રીતે ઓળખવાં? માનસિક સ્વાસ્થ્યમાં ફેરફાર થાય ત્યારે શરીર અને વર્તનમાં પણ કેટલાક સંકેતો જોવા મળી શકે છે. સતત ઉદાસી અથવા નિરાશા અનુભવવી. અગાઉ ગમતી પ્રવૃત્તિઓમાં રસ ઓછો થવો. ઊંઘવામાં મુશ્કેલી પડવી અથવા વધારે ઊંઘ આવવી. ભૂખમાં ફેરફાર થવો. નાની બાબતોમાં ગુસ્સો આવવો અથવા ચીડિયાપણું વધવું. ધ્યાન કેન્દ્રિત કરવામાં મુશ્કેલી પડવી. લોકો સાથે વાત કરવાનું ટાળવું. સતત થાક અને નકારાત્મક વિચારો અનુભવવા. આ લક્ષણો લાંબા સમય સુધી રહે અથવા રોજિંદા જીવનમાં મુશ્કેલી ઊભી કરે તો માનસિક સ્વાસ્થ્ય નિષ્ણાતની સલાહ લેવી જરૂરી છે. માત્ર આ લક્ષણોના આધારે કોઈ માનસિક બીમારીનું નિદાન કરી શકાતું નથી. માનસિક સ્વાસ્થ્ય સારું રાખવા માટે શું કરવું? 1. પૂરતી ઊંઘ લો: દરરોજ નિયમિત સમયે સૂવાની અને જાગવાની ટેવ પાડો. 2. નિયમિત કસરત કરો: ચાલવું, યોગ અથવા હળવી કસરત તણાવ ઘટાડવામાં મદદરૂપ થઈ શકે છે. 3. મનની વાત કોઈ વિશ્વાસુ વ્યક્તિને જણાવો: મુશ્કેલીઓ એકલા સહન કરવાને બદલે પરિવારના સભ્ય, મિત્ર અથવા નિષ્ણાત સાથે વાત કરો. 4. સંતુલિત આહાર લો: પૌષ્ટિક ખોરાક લો અને નિયમિત સમયે ભોજન કરવાની ટેવ પાડો. 5. કામ અને આરામ વચ્ચે સંતુલન રાખો: સતત કામ કરતા રહેવાને બદલે આરામ માટે પણ સમય કાઢો. 6. જરૂર પડે ત્યારે નિષ્ણાતની મદદ લો: કાઉન્સેલર, મનોવિજ્ઞાની અથવા મનોચિકિત્સકની મદદ લેવામાં સંકોચ અનુભવવો નહીં. 7. પોતાની સરખામણી બીજાઓ સાથે ન કરો: દરેક વ્યક્તિની પરિસ્થિતિ અને સંઘર્ષ અલગ હોય છે. પોતાની જરૂરિયાતો અને ક્ષમતાઓને સમજવી જરૂરી છે. માનસિક બીમારી અંગેની ગેરમાન્યતાઓ દૂર કરવી જરૂરી આજે પણ ઘણા લોકો માનસિક સમસ્યાઓ અંગે ખુલ્લેઆમ વાત કરતાં અચકાય છે. કેટલાક લોકો એવું માને છે કે માનસિક તણાવનો સામનો કરતી વ્યક્તિ નબળા મનની હોય છે અથવા તે પોતાની સમસ્યાઓ જાતે જ દૂર કરી શકે છે. પરંતુ આ માન્યતા યોગ્ય નથી. માનસિક સ્વાસ્થ્યની સમસ્યાઓ અનેક કારણોસર ઊભી થઈ શકે છે. જરૂર પડે ત્યારે યોગ્ય સારવાર અને સહાયથી વ્યક્તિની સ્થિતિમાં સુધારો થઈ શકે છે. માનસિક સમસ્યાનો સામનો કરતી વ્યક્તિની મજાક ઉડાવવાને બદલે તેની વાત સાંભળવી, તેને સમજવી અને જરૂરી મદદ મેળવવા પ્રોત્સાહિત કરવી જોઈએ. ભારતમાં માનસિક સ્વાસ્થ્ય માટે ક્યાં મદદ મેળવવી? ભારતમાં માનસિક તણાવ, ચિંતા અથવા અન્ય માનસિક સમસ્યાઓનો સામનો કરતા લોકો માટે મદદ ઉપલબ્ધ છે. ટેલિ-માનસ હેલ્પલાઇન: 14416 આ ભારત સરકારની ટેલિ-માનસિક સ્વાસ્થ્ય સેવા છે. માનસિક સ્વાસ્થ્ય અંગે માર્ગદર્શન અને સહાય મેળવવા માટે આ નંબર પર સંપર્ક કરી શકાય છે. જો કોઈ વ્યક્તિને પોતાને નુકસાન પહોંચાડવાના વિચારો આવે અથવા પોતાને સુરક્ષિત રાખવામાં મુશ્કેલી પડતી હોય, તો તેને એકલા ન છોડવી અને તાત્કાલિક વિશ્વાસુ વ્યક્તિ તથા યોગ્ય આરોગ્યસેવાની મદદ લેવી જોઈએ. વધુ સમાચારો માટે અહીં ક્લિક કરો

Read More »

માંડવીમાં નિઃશુલ્ક નેત્રનિદાન કેમ્પ: ૧૦ ગામના ૭૫ લોકોએ લીધો લાભ

October 8, 2026 No Comments

માંડવીમાં નિઃશુલ્ક નેત્રનિદાન કેમ્પ: ૧૦ ગામના ૭૫ લોકોએ લીધો લાભ Mandvi News માંડવીમાં સેવામંડળ અને ભોજાય સર્વોદય ટ્રસ્ટના સંયુક્ત ઉપક્રમે ‘મોતિયા મુક્ત કચ્છ અભિયાન’ અંતર્ગત નિઃશુલ્ક નેત્રનિદાન અને સારવાર કેમ્પનું આયોજન કરવામાં આવ્યું હતું. માંડવી સેવામંડળના દવાખાનામાં યોજાયેલા આ કેમ્પમાં માંડવી સહિત આસપાસના કુલ ૧૦ ગામના ૭૫ લોકોએ આંખોની તપાસ અને સારવારનો લાભ લીધો હતો. કેમ્પ દરમિયાન ભોજાય સર્વોદય ટ્રસ્ટની હોસ્પિટલના ડૉ. સતિષભાઈ જોશી દ્વારા દર્દીઓની આંખોની તપાસ કરવામાં આવી હતી. તપાસ બાદ દર્દીઓને આંખોની સંભાળ અને સારવાર અંગે જરૂરી માર્ગદર્શન આપવામાં આવ્યું હતું. જરૂરિયાત મુજબની દવાઓ પણ દર્દીઓને નિઃશુલ્ક આપવામાં આવી હતી. ઓપરેશન લાયક દર્દીઓની પણ નિઃશુલ્ક સારવાર કેમ્પ દરમિયાન ઓપરેશનની જરૂરિયાત ધરાવતા દર્દીઓની ઓળખ કરવામાં આવી હતી. આવા દર્દીઓના ઓપરેશન ભોજાય સર્વોદય ટ્રસ્ટની હોસ્પિટલ, ભોજાય (તા. માંડવી) ખાતે નિઃશુલ્ક કરવામાં આવ્યા હતા. ૧૦ ગામના લોકોએ લીધો લાભ આ નેત્રનિદાન કેમ્પનો લાભ માંડવી શહેર ઉપરાંત મસ્કા, ગુંદિયાળી, સલાયા, મેરાઉ, બાડા, કાઠડા, લાયજા, નાગલપુર અને મીઠાપુર સહિત કુલ ૧૦ ગામના ૭૫ લોકોએ લીધો હતો. કેમ્પમાં ભોજાય સર્વોદય ટ્રસ્ટના ડૉ. સતિષભાઈ જોશી સાથે લક્ષ્મીચંદભાઈ ગોસર અને યશદિપસિંહ જાડેજાએ સેવા આપી હતી. કેમ્પને સફળ બનાવવા માંડવી સેવામંડળના પ્રમુખ અશોકભાઈ શાહ તેમજ ટ્રસ્ટીમંડળના ભગવતીપ્રસાદભાઈ મોથારાઈ, ચંદ્રશેનભાઈ શાહ, જયેશભાઈ જી. શાહ, ભાવિનભાઈ શાહ અને દિનેશભાઈ મણીલાલ શાહે જહેમત ઉઠાવી હતી. સેવામંડળના સ્ટાફના દીપકભાઈ સોની, રમેશભાઈ ઓધવાણી, રેખાબેન સોની અને ડોલીબેન રાઠોડે પણ સહયોગ આપ્યો હતો. દર મહિને નિઃશુલ્ક મેડિકલ કેમ્પનું આયોજન ઉલ્લેખનીય છે કે માંડવી સેવામંડળ અને ભોજાય સર્વોદય ટ્રસ્ટના સંયુક્ત ઉપક્રમે દર મહિનાના પહેલા રવિવારે સવારે ૯:૩૦થી બપોરે ૧૨ વાગ્યા સુધી માંડવી સેવામંડળના મંછારામ બાપુના વાડા, ભીડ બજાર, માંડવી ખાતે નિઃશુલ્ક મેડિકલ કેમ્પનું આયોજન કરવામાં આવે છે. આ કેમ્પમાં દર્દીઓને દવાઓ પણ નિઃશુલ્ક આપવામાં આવે છે. ઓપરેશન લાયક દર્દીઓના ઓપરેશન ભોજાય સર્વોદય ટ્રસ્ટની હોસ્પિટલમાં નિઃશુલ્ક કરવામાં આવે છે. આ અંગે ભોજાય સર્વોદય ટ્રસ્ટના ચેરમેન લીલાધરભાઈ ગડા (અધા), માંડવી સેવામંડળના પ્રમુખ અશોકભાઈ શાહ તથા ટ્રસ્ટીમંડળે માહિતી આપી હતી. વધુ સમાચારો માટે અહીં ક્લિક કરો

Read More »

દરશડી ગામે વ્યસનમુક્તિ માટે જંગી રેલી, 1000થી વધુ લોકો જોડાયા

September 27, 2026 No Comments

દરશડી ગામે વ્યસનમુક્તિ માટે જંગી રેલી, 1000થી વધુ લોકો જોડાયા Mandvi News માંડવી તાલુકાના દરશડી ગામે જૈન‍ સંતોની પાવન નિશ્રામાં વ્યસનમુક્તિના પ્રચાર-પ્રસાર માટે જંગી રેલીનું આયોજન કરવામાં આવ્યું હતું. રેલીમાં દરશડી તથા મમાયમોરા ગામની શાળાના વિદ્યાર્થીઓ, શિક્ષકો, સ્ટાફ અને ગ્રામજનો સહિત અંદાજે 1,000 લોકો જોડાયા હતા. કચ્છ આઠ કોટી મોટીપક્ષ સ્થાનકવાસી જૈન સંઘના ગુરુવર્ય પરમ પૂજ્ય ધીરજલાલજી સ્વામીના શિષ્યરત્ન તથા વ્યસનમુક્તિ અભિયાનના પ્રણેતા પરમ પૂજ્ય નરેશમુનિ ‘આનંદ’ મહારાજ સાહેબ અને તેમના શિષ્યરત્ન પરમ પૂજ્ય ઓજસમુની ‘મંગલ’ મહારાજ સાહેબ ચાતુર્માસ નિમિત્તે દરશડી ગામે બિરાજમાન છે. તેમની પાવન નિશ્રામાં યોજાયેલી રેલી દરમિયાન ‘વ્યસનમુક્તિ’ના બેનરો સાથે વિવિધ સૂત્રોચ્ચાર કરવામાં આવ્યા હતા. વિદ્યાર્થીઓ અને ગ્રામજનોની મોટી સંખ્યામાં ઉપસ્થિતિને કારણે સમગ્ર ગામમાં રેલી આકર્ષણનું કેન્દ્ર બની હતી. રેલી દ્વારા સમાજમાં વ્યસનથી દૂર રહેવા અને યુવા પેઢીને વ્યસનમુક્ત જીવન તરફ પ્રેરિત કરવાનો સંદેશ આપવામાં આવ્યો હતો. વ્યસનમુક્તિ અભિયાનના પ્રમુખ ડો. દિનેશભાઈ જોશી, ઉપપ્રમુખ જયેશભાઈ જી. શાહ તથા મંત્રી-ખજાનચી દિનેશભાઈ મણીલાલ શાહે જણાવ્યું હતું કે રેલીમાં દરશડી પ્રાથમિક અને માધ્યમિક શાળા તેમજ મમાયમોરા પ્રાથમિક શાળાના વિદ્યાર્થીઓ, વિદ્યાર્થીનીઓ, શિક્ષક સ્ટાફ અને ગ્રામજનો સહિત આશરે એક હજાર લોકો જોડાયા હતા. રેલી પૂર્ણ થયા બાદ દાતા માતૃશ્રી દેવકાબેન રામજી કકા તરફથી તથા અમૃતબેન દામજી રામજી કકા અને વનિતાબેન લેક્ષ નાગડા (ભોજાય, તા. માંડવી)ના સહયોગથી બાલભોજનનું આયોજન કરવામાં આવ્યું હતું. જેમાં બાલમંદિરથી ધોરણ-12 સુધીના તમામ બાલક-બાલિકાઓએ ભોજનનો લાભ લીધો હતો. વધુ સમાચારો માટે અહીં ક્લિક કરો

Read More »

માંડવીની અંધ અપંગ માનવ કલ્યાણ સોસાયટીને ટોપરાણી પરિવારનું ₹1.75 લાખનું અનુદાન

September 26, 2026 No Comments

માંડવીની અંધ અપંગ માનવ કલ્યાણ સોસાયટીને ટોપરાણી પરિવારનું ₹1.75 લાખનું અનુદાન Mandvi news માંડવીમાં છેલ્લા 34 વર્ષથી અંધ, અપંગ, મંદબુદ્ધિ અને બહેરા-મૂંગા સહિત દિવ્યાંગજનોના ઉત્કર્ષ તથા સેવાકીય કાર્યો માટે કાર્યરત અંધ અપંગ માનવ કલ્યાણ સોસાયટીને મૂળ માંડવીના અને હાલમાં મસ્કત-ઓમાન ખાતે રહેતા વતનપ્રેમી ટોપરાણી પરિવાર દ્વારા ₹1.75 લાખનું અનુદાન આપવામાં આવ્યું છે. સંસ્થાના પ્રમુખ દિનેશભાઈ મણીલાલ શાહ દ્વારા જરૂરિયાતમંદ અને નાદુરસ્ત તબિયત ધરાવતા લોકો માટે ઉપયોગી સાધનો ઉપલબ્ધ કરાવવા માટે મસ્કત ગુજરાતી સમાજના સ્થાપક પ્રમુખ ડો. ચંદ્રકાંતભાઈ ચોથાણી મારફતે ટોપરાણી પરિવારને લેખિત રજૂઆત કરવામાં આવી હતી. સંસ્થા દ્વારા ફોલ્ડિંગ પલંગ, હવાવાળા તથા પાણીવાળા ગાદલા, વ્હીલચેર, વોકર, લેટ્રીન માટેની ખુરશી, બંકોડા, યુરિન પોટ, કફ માટેના સ્યુટ તેમજ લેટ્રીન માટે કમોડ સહિતના સાધનો ટોકન ડિપોઝિટના ધોરણે વિનાભાડે ઉપયોગ માટે જરૂરિયાતમંદ લોકોને આપવામાં આવે છે. ડો. ચંદ્રકાંતભાઈ ચોથાણીના પ્રયત્નો અને પ્રેરણાથી ટોપરાણી પરિવારે સંસ્થાને ₹1.75 લાખનું અનુદાન આપ્યું હતું. આ રકમનો ચેક ડો. ચંદ્રકાંતભાઈ ચોથાણીના ભાઈ તથા સંસ્થાના ખજાનચી પ્રતાપભાઈ ચોથાણીએ સંસ્થાના પ્રમુખ દિનેશભાઈ શાહ, ઉપપ્રમુખ અરવિંદભાઈ શાહ, મંત્રી શાંતિલાલભાઈ ગણાત્રા અને સહમંત્રી સુલતાનભાઈ મીરને અર્પણ કર્યો હતો. આ પ્રસંગે સંસ્થાના સ્થાપક પ્રમુખ ડો. મધુકરભાઈ રાણા, શ્રીમતી સરોજબેન એમ. રાણા, પૂર્વ પ્રમુખ ડો. કૌશિકભાઈ શાહ, વર્તમાન પ્રમુખ દિનેશભાઈ શાહ સહિત સમગ્ર ટ્રસ્ટી મંડળે ટોપરાણી પરિવાર તથા પ્રેરણાદાતા ડો. ચંદ્રકાંતભાઈ ચોથાણીનો આભાર વ્યક્ત કર્યો હતો. વધુ સમાચારો માટે અહીં ક્લિક કરો

Read More »

દરશડીમાં વ્યસનમુક્તિ બેનર સ્પર્ધાનું પરિણામ જાહેર, વિદ્યાર્થીઓએ મેળવી સિદ્ધિ

September 26, 2026 No Comments

દરશડીમાં વ્યસનમુક્તિ બેનર સ્પર્ધાનું પરિણામ જાહેર, વિદ્યાર્થીઓએ મેળવી સિદ્ધિ Mandvi News દરશડી તથા મમાયમોરા શાળાના વિદ્યાર્થીઓએ ઉત્સાહભેર ભાગ લીધો હતો વ્યસનમુક્તિ અભિયાનના પ્રણેતા પ.પૂ. નરેશમુનિ “આનંદ” તથા તેમના શિષ્યરત્ન પ.પૂ. ઓજસમુનિ “મંગલ” મ.સા.ની પાવન નિશ્રામાં વ્યસનમુક્તિ અભિયાનના ઉપક્રમે તથા દરશડી ગામના સમસ્ત સમાજના સહયોગથી વ્યસનમુક્તિના બેનર બનાવવાની સ્પર્ધા યોજાઈ હતી. આ સ્પર્ધાનું પરિણામ જાહેર કરવામાં આવ્યું છે. સ્પર્ધામાં દરશડી ગામની પ્રાથમિક શાળા અને હાઈસ્કૂલના વિદ્યાર્થીઓ ઉપરાંત મમાયમોરા પ્રાથમિક શાળાના વિદ્યાર્થીઓએ પણ ઉત્સાહભેર ભાગ લીધો હતો. વિદ્યાર્થીઓએ બેનર દ્વારા વ્યસનમુક્તિનો સંદેશ સમાજ સુધી પહોંચાડવાનો પ્રયાસ કર્યો હતો. દરશડી પ્રાથમિક શાળાના વિજેતાઓ દરશડી પ્રાથમિક શાળામાં પ્રથમ ત્રણ ક્રમમાં વિજેતા થયેલા વિદ્યાર્થીઓમાં: પ્રથમ: મહેશ્વરી રોતિકા પ્રેમજીભાઈ – ધોરણ 6 દ્વિતીય: બજાણીયા સોયાના મોહમ્મદભાઈ – ધોરણ 8 તૃતીય: મહેશ્વરી મિરલ દિનેશભાઈ – ધોરણ 7 દરશડી હાઈસ્કૂલના વિજેતાઓ દરશડી હાઈસ્કૂલમાં પ્રથમ ત્રણ ક્રમ મેળવનાર વિદ્યાર્થીઓમાં: પ્રથમ: મહેશ્વરી નાત્યા આતુભાઈ – ધોરણ 9 દ્વિતીય: મહેશ્વરી સાક્ષી દિનેશભાઈ – ધોરણ 11 તૃતીય: નાયકા સુનિતા – ધોરણ 11 મમાયમોરા પ્રાથમિક શાળાના વિજેતાઓ મમાયમોરા પ્રાથમિક શાળામાં પ્રથમ ત્રણ ક્રમ મેળવનાર વિદ્યાર્થીઓમાં: પ્રથમ: ઉકાણી જૈની જીગ્નેશભાઈ – ધોરણ 8 દ્વિતીય: જબુઆણી ક્રિષ્ના રજનીભાઈ – ધોરણ 7 તૃતીય: રબારી હિરલ આશાભાઈ – ધોરણ 6 આ અંગે વ્યસનમુક્તિ અભિયાનના પ્રમુખ ડૉ. દિનેશભાઈ જોશી, ઉપપ્રમુખ જયેશભાઈ જે. શાહ તથા મંત્રી અને ખજાનચી દિનેશભાઈ મણીલાલ શાહે જણાવ્યું હતું કે, સ્પર્ધામાં વિદ્યાર્થીઓએ ઉત્સાહપૂર્વક ભાગ લઈ વ્યસનમુક્તિનો સકારાત્મક સંદેશ આપ્યો છે. તમામ વિજેતા વિદ્યાર્થીઓને પ.પૂ. નરેશમુનિ મ.સા., પ.પૂ. ઓજસમુનિ મ.સા., વ્યસનમુક્તિ અભિયાનના હોદ્દેદારો તેમજ દરશડી અને મમાયમોરા ગામના અગ્રણીઓ દ્વારા અભિનંદન અને શુભેચ્છાઓ પાઠવવામાં આવી હોવાનું વ્યસનમુક્તિ અભિયાનના મંત્રી તથા ખજાનચી દિનેશભાઈ શાહે અખબારી યાદીમાં જણાવ્યું છે. વધુ સમાચારો માટે અહીં ક્લિક કરો

Read More »

માંડવીમાં વડાપ્રધાન નરેન્દ્ર મોદીના જન્મદિન નિમિત્તે યોગ શિબિર યોજાઈ

September 26, 2026 No Comments

માંડવીમાં વડાપ્રધાન નરેન્દ્ર મોદીના જન્મદિન નિમિત્તે યોગ શિબિર યોજાઈ Mandvi News સત્સંગ આશ્રમ ખાતે યોગપ્રેમી સાધકો મોટી સંખ્યામા જોડાયા વડાપ્રધાન નરેન્દ્રભાઈ મોદીના જન્મદિન નિમિત્તે ગુજરાત રાજ્ય યોગ બોર્ડ દ્વારા માંડવીમાં વિશેષ યોગ શિબિરનું આયોજન કરવામાં આવ્યું હતું. ગુજરાત રાજ્ય યોગ બોર્ડના ચેરમેન શ્રી શિશપાલજી રાજપૂતના નેતૃત્વ હેઠળ તથા ઝોન કો-ઓર્ડીનેટર સુશ્રી વંદનાબેન રાજાણીના આદેશ અને જિલ્લા કો-ઓર્ડીનેટર શ્રી વિજયભાઈ શેઠના માર્ગદર્શન હેઠળ તા 17 સપ્ટેમ્બરના રોજ સાંજે માંડવીના સત્સંગ આશ્રમ ખાતે આ કાર્યક્રમ યોજાયો હતો. કાર્યક્રમમાં અતિથિવિશેષ તરીકે બ્રહ્મ સમાજ મહિલા પાંખના પ્રમુખ અપર્ણાબેન વ્યાસ, નગરપાલિકાના નગરસેવિકા શ્રીમતી જયશ્રીબેન મુછડીયા, એડવોકેટ ચંદાબેન જોશી તેમજ હોમગાર્ડઝ દળના સક્રિય સભ્ય જય મહેતા ઉપસ્થિત રહ્યા હતા. કાર્યક્રમના પ્રારંભે ઉપસ્થિત મહાનુભાવોના હસ્તે દીપ પ્રાગટ્ય કરવામાં આવ્યું હતું. ત્યારબાદ મહામૃત્યુંજય મંત્રના સામૂહિક મંત્રોચ્ચાર સાથે યોગ શિબિરનો પ્રારંભ થયો હતો. આ પ્રસંગે અપર્ણાબેન વ્યાસે યોગના મહત્વ તથા નિયમિત યોગાભ્યાસથી થતા વિવિધ ફાયદાઓ અંગે માર્ગદર્શન આપ્યું હતું. યોગ ટ્રેનર ઈન્દુબેન પટેલે વડાપ્રધાન શ્રી નરેન્દ્રભાઈ મોદીના જીવન અને જાહેર જીવનમાં તેમના કાર્ય અંગે પ્રાસંગિક ઉદબોધન કર્યું હતું. કાર્યક્રમ દરમિયાન ઉપસ્થિત મહાનુભાવોને ગુજરાત રાજ્ય યોગ બોર્ડ દ્વારા પ્રકાશિત ‘મેદસ્વિતા મુક્ત ગુજરાત’ પુસ્તિકા અર્પણ કરવામાં આવી હતી. સાથે જ શાલ ઓઢાડી મહાનુભાવોને સન્માનિત કરી સ્વાગત કરવામાં આવ્યું હતું. સમગ્ર કાર્યક્રમનું આયોજન માંડવી તાલુકાના યોગ કોચ ગાયત્રીબેન જોશી અને કલ્પનાબેન કષ્ટાના માર્ગદર્શન હેઠળ કરવામાં આવ્યું હતું. કાર્યક્રમનું સંચાલન ગાયત્રીબેન જોશીએ કર્યું હતું, જ્યારે આભારવિધિ કલ્પનાબેન કષ્ટાએ કરી હતી. યોગ શિબિરને સફળ બનાવવા યોગ ટ્રેનરો રંજનબેન સોની, ઈન્દુબેન પટેલ, સંગીતાબેન સોની, ક્રિષ્નાબેન જોશી, આરતીબેન પીઠડીયા, પ્રવિણાબેન ગઢવી તથા ભાવનાબેન પંડ્યાએ જહેમત ઉઠાવી હતી. માંડવી શહેરના યોગપ્રેમી સાધકો બહોળી સંખ્યામાં ઉપસ્થિત રહી યોગ શિબિરમાં જોડાયા હતા. યોગ ટ્રેનર જયભાઈ મહેતાએ જણાવ્યું હતું કે, કાર્યક્રમ દરમિયાન યોગપ્રત્યે લોકોમાં ઉત્સાહ અને સક્રિય ભાગીદારી જોવા મળી હતી. વધુ સમાચારો માટે અહીં ક્લિક કરો

Read More »

ખાવડા CHCની સાંસદ વિનોદભાઈ ચાવડાએ લીધી મુલાકાત, આરોગ્ય સેવાઓની કરી સમીક્ષા

September 24, 2026 No Comments

ખાવડા CHCની સાંસદ વિનોદભાઈ ચાવડાએ લીધી મુલાકાત, આરોગ્ય સેવાઓની કરી સમીક્ષા ભુજ: સેવા મેરા યોગદાન અભિયાન અંતર્ગત કચ્છ-મોરબી લોકસભા મતવિસ્તારના સાંસદ વિનોદભાઈ ચાવડાએ ખાવડા સામૂહિક આરોગ્ય કેન્દ્ર (CHC)ની મુલાકાત લીધી હતી. આ મુલાકાત દરમિયાન તેમણે આરોગ્ય કેન્દ્ર ખાતે નાગરિકોને આપવામાં આવતી વિવિધ આરોગ્ય સેવાઓ અને ઉપલબ્ધ સુવિધાઓ અંગે માહિતી મેળવી હતી. મુલાકાત દરમિયાન આગેવાન દેવજીભાઈ વરચંદ તથા હિતેશભાઈ હિંમતલાલ ખંડોર પણ ઉપસ્થિત રહ્યા હતા. સાંસદે આરોગ્ય કેન્દ્રના તબીબો અને કર્મચારીઓ સાથે ચર્ચા કરી હતી અને અહીં દર્દીઓને મળતી સારવાર અંગે જાણકારી મેળવી હતી. આરોગ્ય સેવાઓ અને દવાઓની ઉપલબ્ધતાની માહિતી મેળવી ખાવડા CHC ખાતે ઉપલબ્ધ આરોગ્ય સુવિધાઓ, દર્દીઓની સારવાર, જરૂરી દવાઓનો જથ્થો તેમજ અન્ય આરોગ્યલક્ષી વ્યવસ્થાઓ અંગે સાંસદે વિગતવાર માહિતી મેળવી હતી. આરોગ્ય વિભાગના અધિકારીઓ અને કર્મચારીઓ દ્વારા કેન્દ્રમાં ચાલી રહેલી કામગીરી અંગે તેમને માહિતી આપવામાં આવી હતી. ખાવડા સહિતના આસપાસના ગ્રામ્ય અને અંતરિયાળ વિસ્તારોના લોકોને સમયસર આરોગ્ય સેવા મળી રહે તે માટે કરવામાં આવતી કામગીરી અંગે પણ ચર્ચા કરવામાં આવી હતી. તબીબો અને આરોગ્ય કર્મચારીઓ સાથે સંવાદ સાંસદ વિનોદભાઈ ચાવડાએ CHCમાં ફરજ બજાવતા તબીબો તથા આરોગ્ય કર્મચારીઓ સાથે મુલાકાત કરી હતી. તેમણે આરોગ્ય સેવાઓની વ્યવસ્થા, દર્દીઓને મળતી સુવિધાઓ અને સ્થાનિક સ્તરે આરોગ્ય ક્ષેત્રે કરવામાં આવતી કામગીરી અંગે માહિતી મેળવી હતી. અંતરિયાળ વિસ્તારમાં આવેલા આરોગ્ય કેન્દ્રો સ્થાનિક લોકો માટે મહત્વપૂર્ણ હોવાથી ત્યાં ઉપલબ્ધ સેવાઓને વધુ સુલભ અને અસરકારક બનાવવા માટે સતત કામગીરી જરૂરી હોવાનું પણ જણાવાયું હતું. મુલાકાતના અંતે સાંસદે આરોગ્ય કર્મચારીઓની કામગીરીની પ્રશંસા કરી હતી અને ખાવડા તથા આસપાસના વિસ્તારોના નાગરિકોને સારી અને સરળતાથી આરોગ્ય સેવાઓ મળી રહે તે માટે સતત પ્રયાસો ચાલુ રાખવા અનુરોધ કર્યો હતો.  વધુ સમાચારો માટે અહીં ક્લિક કરો

Read More »

કચ્છમાં મેલેરિયા-ડેન્ગ્યૂના કેસ સામે આરોગ્ય વિભાગ એલર્ટ, 25 વેક્ટર કન્ટ્રોલ ટીમોને મંજૂરી

September 21, 2026 No Comments

કચ્છમાં મેલેરિયા-ડેન્ગ્યૂના કેસ સામે આરોગ્ય વિભાગ એલર્ટ, 25 વેક્ટર કન્ટ્રોલ ટીમોને મંજૂરી કચ્છ જિલ્લામાં વરસાદી માહોલ વચ્ચે મચ્છરજન્ય રોગચાળાને લઈને આરોગ્ય વિભાગ સતર્ક બન્યો છે. ચાલુ વર્ષમાં જાન્યુઆરીથી 6 સપ્ટેમ્બર સુધી જિલ્લામાં મેલેરિયા અને ડેન્ગ્યૂના કેસ નોંધાયા હોવાનું સામે આવ્યું છે. તાજેતરના વરસાદ બાદ મચ્છરોના ઉપદ્રવમાં વધારો ન થાય તે માટે જિલ્લા આરોગ્ય વિભાગ દ્વારા વેક્ટર કન્ટ્રોલની કામગીરીનું આયોજન કરવામાં આવી રહ્યું છે. ગાંધીનગરથી કચ્છ જિલ્લામાં વેક્ટર કન્ટ્રોલ માટે કુલ 25 ટીમોને મંજૂરી આપવામાં આવી છે. આ ટીમો દ્વારા મચ્છરોના ઉત્પત્તિસ્થળો શોધવા, જરૂરી નિયંત્રણ કામગીરી કરવા અને સંવેદનશીલ વિસ્તારોમાં દેખરેખ રાખવામાં આવશે. ભુજ અને ગાંધીધામમાં ખાસ ટીમો તૈનાત થશે મંજૂર થયેલી ટીમોમાંથી ભુજ તાલુકા માટે 7 ટીમો, જ્યારે ગાંધીધામ મહાનગરપાલિકા વિસ્તાર માટે 5 ટીમો કામગીરી કરશે. વરસાદ બાદ પાણી ભરાવાના સ્થળો અને મચ્છરોની ઉત્પત્તિ માટે અનુકૂળ બનેલા વિસ્તારો પર ખાસ નજર રાખવામાં આવશે. આરોગ્ય વિભાગ દ્વારા લોકોને પણ ઘરની આસપાસ પાણી ભરાઈ ન રહે તે માટે તકેદારી રાખવા અને મચ્છરજન્ય રોગોથી બચવા જરૂરી સાવચેતી રાખવા અપીલ કરવામાં આવી છે. કચ્છમાં મેલેરિયાના 32 કેસ જાન્યુઆરીથી 6 સપ્ટેમ્બર સુધીના આંકડા મુજબ કચ્છ જિલ્લામાં મેલેરિયાના કુલ 32 કેસ નોંધાયા છે. તેમાંથી ગ્રામ્ય વિસ્તારોમાં 25 અને શહેરી વિસ્તારોમાં 6 કેસ નોંધાયા હોવાનું આરોગ્ય વિભાગના આંકડામાં જણાવાયું છે. તાલુકાવાર આંકડા પર નજર કરીએ તો ભુજમાં 3, ગાંધીધામ મહાનગરપાલિકા વિસ્તારમાં 1, મુંદરામાં 4, અંજાર, માંડવી અને રાપરમાં 3-3 તથા અબડાસામાં 2 કેસ નોંધાયા છે. જ્યારે લખપત તાલુકામાં આ સમયગાળા દરમિયાન મેલેરિયાનો એકપણ કેસ નોંધાયો નથી. ડેન્ગ્યૂના 26 કેસ નોંધાયા આ સમયગાળા દરમિયાન કચ્છમાં ડેન્ગ્યૂના પણ 26 કેસ નોંધાયા છે. જેમાં સૌથી વધુ કેસ ભુજ તાલુકામાં નોંધાયા છે. આરોગ્ય વિભાગના જણાવ્યા અનુસાર ભુજમાં ડેન્ગ્યૂના 13 કેસ, ગાંધીધામ મહાનગરપાલિકા વિસ્તારમાં 4 અને અંજારમાં 4 કેસ નોંધાયા છે. મુંદરામાં 3 કેસ જ્યારે લખપત અને ભચાઉ તાલુકામાં એક-એક કેસ નોંધાયો છે. વરસાદ બાદ મચ્છર ઉત્પત્તિ પર ખાસ નજર તાજેતરમાં કચ્છના વિવિધ વિસ્તારોમાં વરસાદ પડ્યો છે. વરસાદ બાદ ખાડા, ખુલ્લા વાસણો, ટાંકા અને અન્ય જગ્યાએ પાણી ભરાઈ રહે તો મચ્છરોની ઉત્પત્તિ માટે અનુકૂળ પરિસ્થિતિ ઊભી થઈ શકે છે. આથી આરોગ્ય વિભાગ દ્વારા સંભવિત હોટસ્પોટ વિસ્તારોમાં વેક્ટર કન્ટ્રોલની કામગીરીને વધુ અસરકારક બનાવવાનું આયોજન કરવામાં આવી રહ્યું છે. જિલ્લા મેલેરિયા અધિકારી ડો. કેશવકુમાર સિંઘ દ્વારા જાહેર કરવામાં આવેલી માહિતી અનુસાર જિલ્લામાં મેલેરિયા અને ડેન્ગ્યૂના કેસોની સ્થિતિ પર આરોગ્ય વિભાગ નજર રાખી રહ્યો છે. વરસાદી સિઝન બાદ મચ્છરજન્ય રોગચાળો ન ફેલાય તે માટે આરોગ્ય વિભાગની ટીમો દ્વારા સર્વેલન્સ અને નિયંત્રણ કામગીરી હાથ ધરવામાં આવશે. વધુ સમાચારો માટે અહીં ક્લિક કરો 

Read More »